دەزگای چاپ و پەخشی سەردەم

ئەم کتێبە، کتێبێکە دەربارەی ڕادیکاڵیزمی فیکری، ئەو شێوازە لە بیرکردنەوە، کە ڕەخنەیەکی پەڕگیر و ھەمەلایەن، لە جیھانی ئەمڕۆ دەگرێت و بەشی ھەرە زۆری ڕەھەندە جیاوازەکانی ئەو جیھانە، نێگەتیڤ دەنرخێنێت و ڕەفز دەکات. ئەم کردەی ڕەخنەکردن و ڕەفزکردنەش لە سێبەری وێناکردنی مۆدێلێکی جیاواز لە کۆمەڵگەیەکی ئایدیالیدا ئەنجام دەدات، کە گوایە بڕێکی زۆر لە کێشەکانی جیھانی ئەمڕۆکەی تیا دانابێت، یاخود ھەر لە بنەڕەتەوە تەواو لە جیھانی ئەمڕۆکە جیاوازە. ھاتن و ئامادەگیی ئەم ئایدیالەش مانای کۆتایی ئەو جیهانەی لە ئێستادا هەیە و ئامادەیە. زۆر جار ئەو مۆدێلە ئایدیالییە چاوەڕوانکراوە، ئەم مۆدێلە بێخەوش و بێکێشەیە، ئەم کۆمەڵگەیە کە هەموومان ڕزگار دەکات، لە فۆرمی مۆدێلێکی گەردوونیدا نیشان دەدرێت و ڕووی لە ھەموو مرۆڤایەتی و کۆمەڵگەکانی سەر زەوییە، خوازیاری ئەوەیە لە ھەموو شوێنێکدا ئامادە بێت و لە ھەموو جێگەیەکدا، شوێنی جیھانی ئەمڕۆکە بگرێتەوە.